08 دلو، 1399 اطلاعاتو او عامه اړیکو آمریت

د ازموینو ملي ادارې رییس پوهاند عبدالقدیر خموش د مشرانو جرګې شکایتونو اورېدو کمیسیون له خوا وستایل شو.

 
د مشرانو جرګې شکایتونو اورېدو کمیسیون رییس ډاکتر زلمي زابلي، په داسې حال کې چې د کمیسیون نور غړي هم حاضر وو، د ازموینو ملې ادارې شفافې کړنې په ځانګړې توګه ١٣٩٩ کال کې د سترو ازموینو د تنظیم په برخه کې د ازموینو ادارې نه ستړي کېدوونکي فعالیتونه ارزښتمن وبلل او د یادې ادارې مشر پوهاند خموش ته یې د افغانستان نقشه ډالۍ کړه.
د مشرانو جرګې سناتورانو د افغانستان دولت په تشکیلاتي جوړښت کې د ازموینو ملي اداره یوه شفافه او مهمه اداره یاده کړه او په دې اداره کې د رامنځ ته شوي ظرفیت او پرمختللي سیستم څخه یې خوښي وښوده.
هغوی وویل د ازموینو ملي ادارې رهبري پلاوي په رښتوني توګه د ازموینو په سیستم کې د فساد مخنیوي لپاره مبارزه کړې چې له امله یې یادې ادارې په ټولنه کې باور لاسته راوړی.
د ازموینو ملي ادارې مشر پوهاند عبدالقدیر خموش د مشرانو جرګې له ملاتړ په ځانګړې توګه د شکایتونو اورې کمیسیون له رییس ډاکټر زابلي او نورو غړو څخه چې تل یې د دې ادارې له سستمونو څخه له نږدې څارنه کړې مننه وکړه او د هغوي ملاتړ یې د کانکور ازموینو د لا شفافیت لپاره اړین وباله.