04 عقرب، 1399 اطلاعاتو او عامه اړیکو آمریت

د ازموینو ملي ادارې د خپلواکه کېدو په موخه نن د مشرانو جرګې څخه د تائید رایه ترلاسه کړه.

د ۱۳۹۹ کال د تلې ۸
د ازموینو ملي ادارې د خپلواکه کېدو په موخه نن د مشرانو جرګې څخه د تائید رایه ترلاسه کړه.
د ازموینو ملي ادارې رهبري پلاوي نن د مشرانو جرګې په تالار کې د ازموینو ملي ادارې د وروستیو کلونو د فعالیتونو، لاسته راوړنو او په ټولنه کې د رامنځته شوي اغېزو په اړه راپور وړاندې کړ.
د ازموینو ملي ادارې سرپرست پوهاند عبدالقدیر خموش د یوې خپلواکې ادارې په توګه د ازموینو ادارې رامنځته کول د هېواد اوسنیو شرایطو لپاره یوه اړینه غوښتنه وبلله او په تېرو دریو کلونو کې یې د دې ادارې پراخه کړنو په اړه مفصل معلومات وړاندې کړل.
نوموړي وویل د ازموینو ملي اداره اوس مهال د عمومي کانکور سربېره په ملکي او نظامي او اکاډمیکو برخو کې هر کال په لس ګونو ازموینې اخلي او په خورا شفافیت او چټکۍ سره یې پایلې اعلانوي. هغه وویل وروسته له هغې چې د ازموینو ملي اداره د ولسمشر د فرمان پر بنسټ د لوړو زده کړو وزارت له چوکاټ څخه بېله شوه په تخنیکي او بشري برخو کې یې خورا ظرفیت لوړ شوی او کولی شي هر ډول ازموینې واخلي.
پوهاند خموش زیاته کړه د ازموینو ملي اداره د پوښتنو غني بانک لری او د یوې ټاکلې ستراتیژۍ له مخې د هرې برخې لپاره ځانګړې پوښتنې برابرولی شي.
د ازموینو ملي ادارې سرپرست د مشرانو جرګې له مشر فضل هادي مسلمیار، مرستیالانو او بېلابېلو کمیسیونونو غړو له ملاتړ څخه چې له یادې ادارې څخه یې څرګند کړه مننه وکړه او ویې ویل په هېواد کې د ازموینو سیستم د لا ښه مدیریت لپاره پراخه پلانونه له ځان سره لري او د ادارې په خپلواکه کېدو سره به یې د عملي تطبیق لپاره ګامونه پورته کړي.
پوهاند خموش د ۱۳۹۹ کال کانکور ازموینې په اړه د مشرانو جرګې غړو پوښتنو ته ځوابونه ورکړل او زیاته یې کړه دغه اداره تل هڅه کوي چې حق تر حقداره ورسوي او د ټولو هغو داوطلبانو غوښتنو ته ځواب وایې چې یادې ادارې ته یې خپل شکایتونه وړاندې کړي دي.

 

په غونډه کې همدارنګه د مشرانو جرګې له خوا د ۱۳۹۹ کال کانکور ازموینو اول نومره څخه تر لسم نومره پورې مخکښو داوطلبانو ته په اکاډمیکو برخو کې د ځوانانو د هڅونې په موخه ستاینلیکونه ورکړل شول.