د کابل ښوونې او روزنې پوهنتون د ماسټرۍ برنامو ازموینه په شفاف او منظم ډول واخیستل شوه! د ازموینو عمومي ادارې له لوري د کابل ښوونې او روزنې پوهنتون د ماسټرۍ (تفسیر، ښوونیز مدیریت او رهبري، فقه او ټولنپوهنه) برنامو ازموینه نن سه‌شنبه، د ۱۴۰۵ کال د زمري/اسد میاشتې په (۱۳مه) نېټه، په کابل ښوونې او روزنې پوهنتون کې د بشپړ شفافیت، عدالت او منظم بهیر له مخې ترسره شوه. د یادې ازموینې د پوښتنو صندوق د ازموینو عمومي ادارې د استازو، د کابل ښوونې او روزنې پوهنتون د مسؤولینو، استادانو او د ازموینې د ګډونوالو په حضور کې پرانیستل شو، ترڅو د ازموینې ټول پړاوونه د روڼتیا، باور او شفافیت په فضا کې ترسره شي. د ازموینو عمومي اداره ژمنه ده، چې د هېواد په کچه ټولې ډله‌ییزې ازموینې د عدالت، شفافیت او امانتدارۍ پر بنسټ تنظیم او ترسره کړي، ترڅو ټولو ګډونوالو ته د سالمې او برابرې سیالۍ زمینه برابره شي.